ಅಡ್ಯಾರ್ ಕಣ್ಣೂರಿನಲ್ಲಿ ಪ್ರತಿಭಟನೆಯ ವೇಳೆ ಪೊಲೀಸರ ಜೀಪ್ ಬಳಸಿದ ಬಗ್ಗೆ ಸ್ಪಷ್ಟನೆ ನೀಡಿದ ಮಂಗಳೂರು ನಗರ ಪೊಲೀಸ್ ಇಲಾಖೆ!

ಏಪ್ರಿಲ್ 18, 2025 ರಂದು ಮಂಗಳೂರು ನಗರದ ಅಡ್ಯಾರ್ ಕಣ್ಣೂರಿನ ಷಾ ಗಾರ್ಡನ್ ಮೈದಾನದಲ್ಲಿ ನಡೆದ ಪ್ರತಿಭಟನಾ ಸಮಾವೇಶದ ವೇಳೆ, ಪ್ರತಿಭಟನಾಕಾರರು ಪೊಲೀಸ್ ಅಧಿಕಾರಿಯವರ ಜೀಪ್ ಅನ್ನು ಬಳಸಿದ್ದಾರೆ ಎಂಬ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. ಈ ಕುರಿತು ಹಲವು ರೀತಿಯ ಅಪಪ್ರಚಾರವೂ ನಡೆಯುತ್ತಿದ್ದು, ಇದೀಗ ಮಂಗಳೂರು ನಗರ ಪೊಲೀಸ್ ಇಲಾಖೆ ಈ ಬಗ್ಗೆ ಸ್ಪಷ್ಟನೆ ನೀಡಿದೆ.

ಪೊಲೀಸರು ನೀಡಿರುವ ಮಾಹಿತಿ ಪ್ರಕಾರ, ಆ ದಿನ ಸಂಚಾರ ಬಂದೋಬಸ್ತು ಕರ್ತವ್ಯದಲ್ಲಿದ್ದ ಎಸಿಪಿ (ಸಂಚಾರ ಉಪ ವಿಭಾಗ) ಅವರು ಪಡೀಲ್ ಕಡೆಯಿಂದ ಕಾರ್ಯಕ್ರಮ ಸ್ಥಳಕ್ಕೆ ಬಂದು, ಅಲ್ಲೇ ಸಂಚಾರ ನಿಯಂತ್ರಣ ಕಾರ್ಯದಲ್ಲಿ ತೊಡಗಿದ್ದರು. ಕಾರ್ಯಕ್ರಮ ಮುಗಿದ ಬಳಿಕ, ಅವರು ತಮ್ಮ ಚಾಲಕರಿಗೆ ಯು-ಟರ್ನ್ ತೆಗೆದು ಅವರನ್ನು ಎಡ್ಯಾರ್ ಕಟ್ಟೆ ಬಳಿ ಓಡಿಸಲು ಸೂಚಿಸಿದ್ದರು. ಆದರೆ, ಅಲ್ಲಿ ಬ್ಯಾರಿಕೇಡ್ ಇದ್ದ ಕಾರಣ ಚಾಲಕ ಇತ್ತಿಚೆಗೆ ಸಾಗುತ್ತಿದ್ದ ಟೆಂಪೋವನ್ನು ತಪ್ಪಿಸಲು ಸಹ್ಯಾದ್ರಿ ಕಡೆಗೆ ಸಾಗುತ್ತಿದ್ದರು.

ಅದರ ನಡುವೆ, ಅಂದಾಜು ರಾತ್ರಿ 7:30ರ ಸುಮಾರಿಗೆ ಒಂದು ಟೆಂಪೋ ವಾಹನ ವೇಗವಾಗಿ ಹಾಗೂ ಅಜಾಗರೂಕತೆಯಿಂದ ಚಾಲನೆ ಮಾಡಿಕೊಂಡು, ಕಾರ್ಯಕ್ರಮದಿಂದ ಹೊರಬರುತ್ತಿದ್ದ 16 ವರ್ಷದ ಬಾಲಕನಿಗೆ ಡಿಕ್ಕಿ ಹೊಡೆದು, ಪಾದದ ಮೇಲೆ ಚಕ್ರ ಹಾದುಹೋಗಿದ್ದರಿಂದ ಗಂಭೀರವಾಗಿ ಗಾಯವಾಗಿದ್ದ. ಈ ವೇಳೆ, ಸ್ಥಳದಲ್ಲಿ ಕರ್ತವ್ಯದಲ್ಲಿದ್ದ ಇಬ್ಬರು ಮಹಿಳಾ ಪೊಲೀಸ್ ಸಿಬ್ಬಂದಿಯವರು ತಕ್ಷಣ ಕಾರ್ಯಪ್ರವೃತ್ತರಾಗಿ, ಎಸಿಪಿಯವರ ಜೀಪ್ ನಿಲ್ಲಿಸಿ ಗಾಯಾಳುವನ್ನು ತ್ವರಿತವಾಗಿ ಆಸ್ಪತ್ರೆಗೆ ಕಳುಹಿಸಿದ್ದರು.

ಅಪಘಾತ ಮಾಡುವ ಟೆಂಪೋ (ನಂಬರು: ಕೆಎ 70 9888) ಚಾಲಕನನ್ನು ಠಾಣೆಗೆ ಒಪ್ಪಿಸಲಾಯಿತು ಮತ್ತು ಪ್ರಕರಣ ದಾಖಲಿಸಿ ತನಿಖೆ ಪ್ರಾರಂಭವಾಗಿದೆ.

ಪೊಲೀಸ್ ಇಲಾಖೆ ತಿಳಿಸಿದ್ದು, ಗಾಯಾಳುವಿಗೆ ತಕ್ಷಣ ಚಿಕಿತ್ಸೆಯನ್ನೊದಗಿಸಲು ಪೊಲೀಸ್ ವಾಹನ ಬಳಸಲಾಗಿದೆ ಮತ್ತು ಇದು ಅವರ ಕರ್ತವ್ಯಕ್ಕೂ ಒಳಪಟ್ಟ ವಿಚಾರವಾಗಿದೆ. ಮೊದಲ ಗಂಟೆ (ಗೋಲ್ಡನ್ ಅವರ್) ಯಲ್ಲಿ ಚಿಕಿತ್ಸೆ ನೀಡುವುದು ಜೀವ ರಕ್ಷಣೆಗೆ ಅತ್ಯಂತ ಮುಖ್ಯ, ಎಂಬ ಕಾರಣದಿಂದ ಮಹಿಳಾ ಸಿಬ್ಬಂದಿಯವರು ಜಾಣ್ಮೆಯಿಂದ ನಡೆದು ಗಾಯಾಳುವನ್ನು ಆಸ್ಪತ್ರೆಗೆ ತಲುಪಿಸಿದ್ದಾರೆ.

ಮಂಗಳೂರು ನಗರ ಪೊಲೀಸ್ ಆಯುಕ್ತರು ಈ ಸಂಬಂಧ ಸ್ಪಷ್ಟನೆ ನೀಡಿದ್ದು, ಸಾರ್ವಜನಿಕರಲ್ಲಿ ತಪ್ಪು ಅಭಿಪ್ರಾಯ ಉಂಟಾಗದಂತೆ ಇರಲು ಈ ಮಾಹಿತಿ ಹಂಚಿಕೊಳ್ಳಲಾಗಿದೆ.