ದಕ್ಷಿಣ ಕನ್ನಡ ಜಿಲ್ಲಾ ನಿಯಂತ್ರಣ ಕೊಠಡಿಯ ಪೊಲೀಸ್ ನಿರೀಕ್ಷಕ ಪದ್ಮಯ ರಾಣೆರವರಿಗೆ ವಿದಾಯ – 33 ವರ್ಷಗಳ ಉಜ್ವಲ ಸೇವೆಗೆ ಗೌರವ.

ಮಂಗಳೂರು:ದಕ್ಷಿಣ ಕನ್ನಡ ಜಿಲ್ಲಾ ನಿಯಂತ್ರಣ ಕೊಠಡಿಯ ಪೊಲೀಸ್ ನಿರೀಕ್ಷಕರಾಗಿ ಸೇವೆ ಸಲ್ಲಿಸುತ್ತಿದ್ದ ಶ್ರೀ ಪದ್ಮಯ ರಾಣೆರವರು ಇಲಾಖೆಯಲ್ಲಿ 33 ವರ್ಷಗಳ ಸುದೀರ್ಘ ಮತ್ತು ಸದೃಢ ಸೇವೆ ಸಲ್ಲಿಸಿ 2025ರ ಜುಲೈ 31ರಂದು ವಯೋನಿವೃತ್ತಿ ಹೊಂದಿದ್ದಾರೆ.

1992ರಲ್ಲಿ ಕರ್ನಾಟಕ ರಾಜ್ಯ ಪೊಲೀಸforceನಲ್ಲಿ ನಿಸ್ತಂತು ಸೇವೆಗೆ ಸೇರಿದ್ದ ಇವರು, ತಮ್ಮ ಕಾರ್ಯಕ್ಷಮತೆಯ ಮೂಲಕ  ವಿವಿಧ ಜಿಲ್ಲೆಗಳಲ್ಲಿ ಅತ್ಯಂತ ನಿಷ್ಠೆಯಿಂದ ಸೇವೆ ಸಲ್ಲಿಸಿದ್ದಾರೆ. ಅವರು ತಮ್ಮ ಮೊದಲ ಸರಕಾರಿ ಸೇವೆಯನ್ನು ಶಿಕಾರಿಪುರ ಪೊಲೀಸ್ ರೇಡಿಯೋ ಸ್ಟೇಷನ್‌ನಲ್ಲಿ ವೈರ್ ಲೆಸ್ ಆಪರೇಟರ್ ಆಗಿ ಆರಂಭಿಸಿದ್ದರು (1992–1997). ನಂತರ 1997 ರಿಂದ 2011ರವರೆಗೆ ಶಿವಮೊಗ್ಗ ಜಿಲ್ಲಾ ನಿಯಂತ್ರಣ ಕೊಠಡಿಯಲ್ಲಿ ಸೇವೆ ಸಲ್ಲಿಸಿದರು. ಬಳಿಕ 2011 ರಿಂದ 2014ರ ವರೆಗೆ ಎ ಎನ್ ಎಫ್ ಕಾರ್ಕಳ ವಿಭಾಗದಲ್ಲಿ ಕರ್ತವ್ಯ ನಿರ್ವಹಿಸಿದರು.

2014ರಿಂದ 2025ರ ವರೆಗೆ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಜಿಲ್ಲಾ ನಿಯಂತ್ರಣ ಕೊಠಡಿಯಲ್ಲಿ ಸೇವೆ ಸಲ್ಲಿಸಿರುವ ಶ್ರೀ ರಾಣೆರವರು, ತಮ್ಮ ಶಿಸ್ತುಬದ್ಧ ಸೇವೆಯಿಂದ ಹಿರಿಯ ಅಧಿಕಾರಿಗಳ ಮೆಚ್ಚುಗೆ ಪಡೆದಿದ್ದರು. ವಿಶೇಷವಾಗಿ, ಅವರು 2022ನೇ ಸಾಲಿನ ಮಾನ್ಯ ಮುಖ್ಯಮಂತ್ರಿಯವರ ಚಿನ್ನದ ಪದಕಕ್ಕೆ ಭಾಜನರಾಗಿದ್ದಾರೆ ಎಂಬುದು ಗೌರವದ ವಿಚಾರ.

ಅವರ ಸೇವೆ ಪುರಸ್ಕರಿಸುವಂತೆ ಪೊಲೀಸ್ ಇಲಾಖೆಯವರು ಹಾಗೂ ಸಹೋದ್ಯೋಗಿಗಳು ಶುಭಾಶಯಗಳನ್ನು ತಿಳಿಸಿದ್ದಾರೆ. ಸೇವಾ ಜೀವನದಲ್ಲಿ ಅನುಸರಿಸಿದ್ದ ಶಿಸ್ತಿನ ಧೋರಣೆ ಹಾಗೂ ಕಾರ್ಯನಿಷ್ಠೆ, ಮುಂದಿನ ಪೀಳಿಗೆಗೆ ಪ್ರೇರಣೆಯಾಗಲಿದೆ.